Arthez-d’Asson-go burdinola - Arthez d’Asson

Oinez nahiz bizikletaz egin daitekeen ibilbideak burdinolaren instalazioak zeuden eremua zeharkatzen du. Puntu horretatik, gainera, burdinolaren jabeen bizitokia ikusi daiteke: jauretxe bat, egun nekazari familia baten esku dagoena. Ondoren, bidean aurrera eginez, SHEMek ustiapen hidroelektrikorako egindako instalazioak ikusi daitezke. Ouzom ibaiaren ertzean arrainentzako igarobide bat dago, zeina oso ikusgarria izan baitaiteke arrantza sasoian. Errepidean gora eginez gero, herriko animazio aretoaren gainean, Fer et Savoir-Faire elkartearen lokala dago; bertan, burdinolarekin lotutako objektuen eta informazio historikoen bilduma ikusi daiteke.

Tokian tokiko produktuak dastatzea gustuko dutenentzat, herrian badira zenbait gaztagile, era guztietako gaztak egiten dituztenak: ardi gazta, behi gazta eta ahuntz gazta. Eta kirolari zein mendizaleentzat, ibilbide ugari daude Asson eta Arthez-d’Asson artean, Estibète tontorrera, Isarce tontorrera nahiz Monbulako begiratokirantz, non basoa ikazkintzarako ustiatzen zen garaiko txondor plazak ikusi baitaitezke bide ondoan.